Apprenticeships MCAST
Integrating work and study, to build your future

Click here for the https Apprenticeship Tool Kit

X’inhu l-Apprendistat?
L-apprendistat huwa taħlita mill-aqwa ta’ tagħlim fil-Kulleġġ u ta’ taħriġ prattiku li jingħatalek fl-industrija bi preparazzjoni għall- karriera tal-għażla tiegħek. L-apprendistat jagħtik iċ-ċans tiżviluppa
l-kompetenzi tekniċi tiegħek permezz ta’ esperjenza f’xogħol ta’ veru. Din l-esperjenza tgħin biex tagħtik vantaġġ fuq individwi oħrajn li jkunu qed ifittxu x-xogħol. Bħala apprendist, int ikollok l-opportunita’ li tagħmel esperjenza ta’ tagħlim f’industriji lokali u/jew internazzjonali. Hekk int ikollok iċ-ċans tiżviluppa l-kreattivita’ tiegħek kif ukoll trawwem ħiliet li jagħmluk kapaċi ssib soluzzjonijiet għall-problemi. L-MCAST joffri aktar minn 50 kors fuq apprendistat. Dawn il-korsijiet fil-Livelli 3 u 4 tal Qafas Malti għall-Kwalifiki huma mifruxa f’setturi differenti, u għalhekk joffrulek għażla wiesgħa ta’ industriji u stabbilimenti fejn inti tista’ titħarreġ u titgħallem.

L-Apprendistat Fl-MCAST

Għalfejn għandek tagħżel li tagħmel apprendistat?
L-apprendistat jipprovdilek opportunita’ ta’ taħriġ siewi ħafna f’ambjent awtentiku ta’ xogħol fl-industrija. Permezz tal-apprendistat, int ikollok iċ-ċans li tiltaqa’ ma’ sidien li jħaddmu u li ssib opportunitajiet biex issir tagħmel parti mill-korp tal-ħaddiema. Dan waqt li tkun qed tiżviluppa l-kompetenzi tiegħek. Barra minn hekk, bħala apprendist “taqla’ l-flus waqt li titgħallem”, filwaqt li ssaħħaħ il-ħiliet li għandek bżonn biex issir ħaddiem professjonali fil-karriera li tkun għażilt. Bħalissa l-MCAST qed jaħdem ma’ iktar minn 1,000 kumpannija lokali biex ikun jista’ jipprovdi opportunitajiet ta’ apprendistat ta’ kwalita’ għolja. Dawk li jħaddmu jafu li student li jiddeċiedi li jidħol għal apprendistat ikun qed jieħu l-karriera li jkun għażel bis-serjeta’ – u dan jagħmel differenza. Huma jafu li l apprendisti huma dejjem entużjasti u ħerqana biex jitgħallmu u jaħdmu. L-apprendistat jagħmel it-tranżizzjoni għas-suq tax-xogħol aktar faċli u jagħti lill-apprendisti l-opportunità li jakkwistaw
kompetenzi li jinkisbu aħjar fl-ambjent tax-xogħol.

Kemm idum l-apprendistat?
Normalment, apprendistat idum bejn sena u tliet snin, iżda dan jiddependi minn kif ikun strutturat. Għalhekk huwa importanti li tkun impenjat biżżejjed biex tagħmel l-apprendistat sħiħ.

L-apprendistat jikkonsisti f’taħriġ kemm fuq il-post tax-xogħol kif ukoll ‘il bogħod mill-post tax-xogħol għal perjodi ta’ żmien speċifikat. Il-programmi jibdew f’wieħed mill-Istituti tal-MCAST fejn l-apprendist jingħata bażi soda fl-għarfien meħtieġ għat-twettiq tax-xogħol tal-għażla tiegħu. Dan ikun segwit minn taħriġ f’xogħol proprju fi stabbiliment ta’ min iħaddem biex hekk l-apprendist jikseb il-prattika neċessarja.